Ka kōkiritia ā mātou tatauranga motuhake i te ao ōhanga o Aotearoa me te whakamōhio hoki ngā whakatau kaupapa nui ā-hapori.
Ko Tatauranga Aotearoa te kai-tātaki hei kohi me te tā i ngā pārongo matua e pā ana ki te nuinga o ngā mea. Ko ētahi o ngā tatauranga ka whakaputaina e mātou ko ēnei:
- te tātā whainga o ngā umanga o Aotearoa;
- te whakapau pūngao;
- ngā take ahu whenua;
- ngā rawa a Tangaroa;
- ngā momo ika;
- ngā tatauranga hokohoko;
- ngā kaupapa ā-turuhi;
- ā tātou whiwhinga pūtea;
- te utunga rawa, me
- te āhuatanga o ngā iwi o Aotearoa.
Ko mātou te taunga tuatahi mehemea e whakatau ana ngā kaupapa matua i roto i ō tātou hapori, te kāwanatanga me ngā umanga nui, umanga iti rānei. Ka kitea ā mātou tatauranga i ngā niupepa, te reo irirangi, te ipurangi me te pouaka whakaata i ia rā, i ia rā – e whakaatu ana i ngā tino kōrero mō ngā take whai pānga.
Ka kawekawe ngā tatauranga tika, tatauranga whai pānga hoki i ngā whakatau pēnei ki te wāhi tika kia tū ai he kamupene, ngā kura me ngā hohipera hoki, tae rawa ake ki te whakatauranga ā-pūtea tāwere o Aotearoa.
Atu i ēnei, nā ā mātou pārongo ka hiria te mahara, ā, ka kitea hoki ngā huarahi e wātea ana. Nā ngā tatauranga ka puta ai ngā hononga e taea ai te tangata ki te whakatū i ēnei.
Neke atu i te ono tekau miriona ngā pārongo ka kohia e mātou i ia tau, ā, ka hono tahi mātou ki ngā kai-rangahau, ngā tari kāwanatanga me ngā tohunga nō rāwāhi hei whakamōhiotanga mō ngā iwi katoa o Aotearoa.
Tērā pea kua waia kē koe ki a mātou, nā tō mātou tirohanga whānui ka whakahaeretia i ia rima tau, arā, Te Tatauranga- hei whakaahua hopu noa i te āhua o Aotearoa.
Mā ngā tirohanga whānui pēnei ki Te Tatauranga ka whakaputaina te nuinga o ā mātou tatauranga, engari kei te piki haere tā mātou whakamahi i ngā kōrero pēnei ki te GST, ngā kāri whakataunga ā-rāwāhi me ngā pūranga kōrero a Te Mana Ārai o Aotearoa.
I roto i ā mātou tirohanga whānui katoa, e toru ngā āhuatanga e kaingākau ana mātou ki ngā iwi katoa o Aotearoa.
Tuatahi, kia auaha mātou ki te kimi huarahi e pai ai te tere whakaoti i ngā tirohanga whānui.
Tuarua, ka tiakina mātou i ngā pārongo ka hōaturia e koe ki a mātou kia noho matatapu. E kore e taea te tautohu he kamupene, he tangata rānei i ngā tatauranga ka puta i a mātou. Ka whakamaua tēnei whakaaro kia tina i ā mātou mahi katoa.
Tuatoru, kia whai wāhi atu ā mātou tatauranga ki ngā wāhi katoa. Ka noho ēnei pārongo hei kōrero tārehu kia tae atu ki te wā ka pānuitia ki te hunga whakapaoho me te ipurangi hoki. Nā runga i tō mātou rangatiratanga, e kore e taea e te Minita Tatauranga me ētahi atu tari kāwanatanga te mōhio i ngā whakapae i mua tata mai o te pānuitanga.
Kia pānuitia ā mātou tatauranga, ka whai wāhi ēnei ki ngā iwi katoa o Aotearoa i ngā wā katoa.
Ka kitea ēnei mā:
- tō mātou whārangi ipurangi e kitea mai ana ngā papatau. He māmā noa iho te whakamahi i ēnei me te hanga ki tāu e pīrangi ana;
- tō mātou puna kōrero;
- ō mātou rārangi akoranga ā-hapori, ā-kura hoki;
- ngā wharepukapuka puta noa i te motu;
- Te Pūtake – arā, ko ngā taumata kōrero mō ngā tohunga whakamahi
- ko ngā tānga pukapuka hākirikiri, mātanga hoki,
- me te Statisphere, he momo tomokanga ipurangi mō ngā tatauranga katoa o te kāwanatanga whānui tonu.
Kua whai mana tonu te rongo o Tatauranga Aotearoa, nā tō mātou kaha ki te kohi me te whakaputa tatauranga i ngā tōpito o te ao. Ka mahi tahi mātou ki nga whakanōhanga o te tatauranga puta noa i te ao ki te whakawhitiwhiti whakaaro e taea ai mātou te mahi tika i ēnei mahi ki Aotearoa nei.
Ko tō mātou whainga matua tēnei - kia whai wāhi atu, kia whai pānga atu, kia whai tika atu ā mātou tatauranga ki ngā iwi katoa o Aotearoa.
Ko mātou ko Tatauranga Aotearoa – ko tō matatiki mōhiohio matua hei whiria ngā whakatau kaupapa nui.